Sjómannslíf sjómannslíf......

Já það gengur á ýmsu en ekki er ástæða til þunglyndis þrátt fyrir haugrifið veiðarfæri og fjármálakreppu. Við köstuðum á Grundarfirðinum á fínt lóð en ekki vildi betur til en að nótin liggur á gjörgæslu á Akranesi. Skítt með það en verra þykir að þegar nótinni var spólað í land féll stærðar haugur yfir dráttarblökkina og ofan á einn af mönnunum sem komu til að gera við hana og fór hann burt af bryggjunni í sjúkrabíl. Við fyrstu sýn virtist hann fótbrotinn jafnvel á báðum en það er birt án ábyrgðar og vonum við að það hafi farið eins vel og mögulegt var.

erum á leið inn á Grundafjörð að sækja aðra nót og svo skulu hendur standa framúr ermum, fyllum allar lestar af síld og förum til Hornafjarðar. Bara að það væri jafn einfalt að framkvæma það eins og að slá það inná lyklaborð.

Villi Harðar hefur í kreppunni séð að sér og á dögunum opnaði hann verslun um borð sem fékk nafnið Birtubúð. Þar selur hann ymsar gerðir af sælgæti og mun hann Villi sennilega koma betur út úr kreppunni en margur annar. Villi fjárfesti einnig í sparigrís á Hornafirði um daginn sem undir eins var skírður Kreppusvínið. Þar mun hann naga saman því sem í síðasta mánuði var litið á sem óþarfa rusl í vasa en verður sennilega það sem heldur Villa á floti þegar harðnar á dalnum.

Verið sæl að sinni og góðar stundir.

Piltarnir á Birting.

Athugasemdir

[Steini (IP-tala skráð) 20.10.2008 kl. 15:45]

Vonandi fer að ganga betur hjá ykur...ég vissi reyndar ekki að það væri til það mikið af nótum á landinu að þið gætuð skipt vikulega... :)

[Ýr (IP-tala skráð) 21.10.2008 kl. 10:43]

Hehehehe...góður Steini. Það á ekki að þeim að ganga, er farin að halda að það fylgi Vilmundi einhver óhappadís...hehe...

Vonandi fer þetta nú eitthvað að ganga, alveg komin tími til.

Ps. Sakna þín ástin :*

[Villi H. (IP-tala skráð) 21.10.2008 kl. 14:34]

Jahá, hann er óhappaDÍs drengurinn sá arna. Enda alinn upp á einhverjum mesta útnára sem um getur. En við reynum sem unnt er að gera hvað við getum til að hafa af honum not.